Untitled

Kailangang-Kailangan:

Mapagkaisang Pamumuno

(Agosto 22, 2001)

LALONG KAILANGAN ngayon ang malalakas na kooperatiba para makaalalay sa lalong papahirap na kabuhayan ng ating mga kababayan. Ang problema, marami sa ating mga kooperatiba sa Pilipinas ngayon ay hindi naman malakas. Kaya di tuloy makilala at mapahalagahan ang kooperatiba bilang sandalan ng mga myembro sa panahon ng kagipitan at tuntungan sana sa sama-sama nilang pag-asenso. Ano’ng masasabi mo, Joydee?

Nasa kalidad din ng pamumuno ‘yan, eh.

Ibig mong sabihin, ‘pag magaling talaga ang pamunuan, malakas ang koop?

Oo naman! Pero ang galing na sinasabi ko, yung galing na talagang pang-kooperatiba, ha! Ibig sabihin, epektibong pamumuno para mabuo nang matibay ang kooperasyon ng buong kasapian, at epektibong pamumuno para maging malakas ang pagnenegosyo ng koop mismo. Kasama rito ang aktibo at mahusay na edukasyon.

Sige, sundan natin ‘yan. Nasasabi na rin kasi natin sa mga pagsasanay at artikulo ng SanibLakas Foundation na ang tunay na liderato sa isang malakas na organisasyon ay hindi yung diktador na mag-uutos lang sa lahat. Hindi rin yung superman o wonder woman na siya na lang ang gumagawa ng lahat ng trabaho, at papalakpakan na lamang siya ng kasapian. Hindi po kasi slave army at hinding-hindi rin fans club ang isang malakas na koop. Ang talagang lakas kasi ng isang koop o anupamang organisasyon ay nasa ganap na teamwork, nasa mahusay na pagsasanib-sanib ng pinalalaki pang determinasyon at kakayahan ng lahat ng myembro.

Ginanahan ka naman d’yan, ah! Paborito mo talagang paksa yan, ano? Pero madugtungan ko lang sandali ‘yan. Kaya nga sinabi ko kanina na nasa kalidad din ng pamumuno nakasalalay ang lakas ng koop. Dapat nating ilinaw na ang mga myembro ang pumipili ng pamunuan, kaya kalidad pa rin ng pagpili ang mahalaga. Paano ba natin pinipili ang mga direktor para sa Board ng koop? Popularidad? Abilidad magpasok ng pera na inuutang sa labas? Malapit kay Meyor? Utang na loob natin sa mga nagtayo at namuno sa koop mula noong nineteen kopong-kopong pa? Ano ba’ng hinahanap natin?

May naalala ako d’yan sa sinabi mong “malapit kay Meyor.” Sa isang bayan po diyan sa Central Luzon, mga kaibigan, talagang hindi kailangang malakas sa munisipyo ang koop. Yung munisipyo kasi ang nangungutang sa koop para maipansweldo sa mga empleado, dahil naiipit pa raw ang pondo nito sa national. Kaya ang tatakbong meyor, dapat malakas sa mga koop!

Tapusin na po sana natin, mga kaibigan, ang panahon na ang pamumuno sa ating mga samahan, lalo na sa ating mga kooperatiba, ay dinadaan sa pagka-diktador o pagka-superstar. Kooperasyon nga kasi ang batayan ng kakayahan ng kooperatiba, at ang dapat ginagawa nito ay mahusay at matagumpay na pagnenegosyo bilang isang koop.

At kailangang mabuo ang isang malakas na kooperasyon sa loob mismo ng Board of Directors. Hindi lang naman kasi yung Chairman of the Board ang Board. Di ba, maganda ang kombinasyon sa loob ng pamunuan kung ang dati nang mga pinuno, na marami nang karanasan, ay kasama ng mga bago, na mas nakaayon naman at sanay sa bagong mga paraan ng pagpapalakas sa organisasyon at sa mga bagong paraan ng pagnenegosyo?

Tama! Imbes na magpaligsahan sa pwesto ang mga dati nang pinuno at ang mga bagong pinuno, dapat silang matuto ng teamwork. Paano silang mamumuno sa isang malakas na kooperasyon kung sila mismo ay di marunong ng kooperasyon?

Sa mahigpit na teamwork ng mga pinuno, mas mabibigyan talaga nila ng inspirasyon ang kasapian. Di po chika lang ito, mga kaibigan, may mga lider-koop na ang pamamaraan at asal ay talagang kumokontra sa tunay na diwa ng kooperatibismo. Kasiraan tuloy ng buong koop! Wala na kaming tutukuying sinuman dito. Tayong lahat na lang po sana ang tumingin.